Stuhi të reja të fuqishme po kalojnë nga Italia në drejtim të Gadishullit Ballkanik, sidomos në Slloveni, Kroaci, Bosnjë dhe Hercegovinë dhe Serbi, kurse stuhi të izoluara pritet të ndodhin edhe në territoret tona gjatë ditës së Hënë.
Reshje dhe rrebeshe të dendura shiu parashihen që nga jugu i Gjermanisë ku po ndodhin vërshime masive deri në Ballkan ku vende-vende do të ketë reshje mjaft të fuqishme shiu. Në Ballkan dhe viset tona reshje nuk do të jenë gjithëpërfshirëse.
Më së shumti rrebeshe mjaft intensive sonte dhe të Hënën parashihen në territorin e Bosnjës dhe Hercegovinës, Serbisë, Kroacisë dhe Sllovenisë. Reshje dhe rrebeshe priten edhe në Mal të Zi dhe disa vise tona në Shqipëri, Kosovë, Maqedoninë Veriore dhe Luginë të Preshevës. Krahasuar me Evropen dhe disa vise në Ballkan afër qendrës së masave të fuqishme ciklonike në viset tona reshjet do të jenë shumë më të pakta. Në disa vise nuk priten fare reshje, megjithatë në disa zona mund të ketë ndonjë shtrëngatë të fuqishme kalimtare me shi dhe breshër gjatë ditës së Hënë.
Shtrëngata shumë të fuqishme me breshër masiv parashihen sidomos në territorin e Serbisë.
Përndryshe, temperaturat do të jenë të larta sidomos për shkak të zagushisë, kurse një valë mjaft e fuqishme e nxehtësisë afrikane na pret afërsisht nga mesi i javës së re duke kulmuar gjatë vikendit dhe fillimit të javës tjetër me temperatura që mund të arrijnë deri në 35 gradë Celsius edhe në Kosovë, sepse për Shqipëri dhe Maqedoninë Veriore as mos të flasim. Reshjet dhe rrebeshet e shiut do të rrallohen dukshëm gjatë kësaj vale të nxehtësisë, madje mund të ndodhë që të mos ketë fare reshje për një periudhë kohore pesë ose gjashtë ditore. Për këtë do të flasim gjatë javës së re./MeteoBallkan
