Masa të fuqishme ajrore ciklonike kanë përfshirë Mesdheun e sidomos Italinë e cila përkundër territorit të madh nuk shihet fare nga Sateliti për shkak të vranësirave të dendura. Vranësira të dendura ka edhe në shumë pjesë të Gadishullit Ballkanik, ndërsa reshjet e shiut janë të karakterit lokal.
Reshje shiu ka që nga Sllovenia, pjesë të Kroacisë, Italisë, Bosnjës dhe Hercegovinës, Malit të Zi dhe Shqipërisë e deri në Greqi. Vranësira të shumta ka që nga Britania e Madhe, pastaj në Gjermani, pjesë të Zvicrës, Austrisë dhe Francës. Në Francë dhe Gjermani kemi stuhi të izoluara. Dielli po rrëzon vetëm në Spanjë dhe Portugali si dhe në disa pjesë të Evropes verilindore ku temperaturat janë të ulëta, ndërsa temperatura verore ka vetëm në Spanjë, Portugali dhe disa pjesë të Turqisë.
Mot mjaft i paqëndrueshëm në rajonin tonë do të mbajë edhe ditëve të ardhshme për shkak të masave ciklonike që mbesin mjaft aktive në Itali dhe Detin Adriatik. Moti do të jetë mjaft i ndryshueshëm me reshje të herëpashershme lokale shiu. Nga e premta (pasnesër) temperaturat do të fillojnë të rriten, por në Kosovë do të ketë kushte për rrebeshe shiu me vetëtima dhe bubullimë.
E Shtuna pritet të jetë me më shumë rreze diellore dhe temperatura rreth vlerave mesatare, megjithatë priten edhe vranësira lokale dhe ndonjë rigë ose rrebesh i izoluar shiu.
Masat fuqishme ciklonike mbesin aktive edhe gjatë fundjavës dhe fillimit të javës së re ku përpos intervaleve kohore me diell priten vranësira dhe reshje të herëpashershme shiu./METEOBALLKAN
